.
.
Terwyl daar langer as verwag gewag is vir 'n staatsambulans om 'n vrou in haar vroeë twintigs se naakte lyk van die strand by Diazville, Saldanha, te kom verwyder, het die wind stadig maar seker haar laaste waardigheid weggewaai.
Die vrou is Tasmie Jansen (20) wat in Middelpos gebly het.
'n Groep mans wat wou gaan visvang het vanoggend (Vrydag 26 April) omstreeks 09:00 op die strand op haar lyk naby die Tabakbaai-vakansieoord afgekom. Sy het leweloos op haar rug gelê en het geen klere aangehad nie.
Die Saldanha-polisie het later in die duine daar naby plakkies en ander kledingstukke gekry. Dit behoort vermoedelik aan Jansen, wie se familielede haar op die strand uitgeken het.
Gemeenskapslede het vertel dat hulle haar Donderdag 25 April nog by 'n kerk se sopkombuis gesien het.
Kapt. Tania Helfrich, woordvoerder vir die Weskus-polisie, het gesê die ondersoek is nog in die beginstadium en enigiemand met meer inligting word versoek om die ondersoekbeampte in die saak, AO Hein Schmidlin, by 082 324 0533 te bel.
Lees volgende week se Weslander vir 'n volledige berig.
