.
.
André de Ruyter, voormalige uitvoerende hoof van Eskom, se eerste openbare verskyning in Suid-Afrika in meer as ’n jaar was gelaai met kwinkslae oor die regering en die huidige Eskom-bestuurspan.
Die gehoor op die PSG-beraad, wat Woensdag in Sun City begin het, het verskeie kere luidkeels gelag vir die uitlatings van ’n baie geruste De Ruyter.
De Ruyter is in sy onderhoud op die verhoog gevra wat hy dink van dr. Kgosientsho Ramokgopa, minister van elektrisiteit, Eskom se bestuurspan en ander in die regering se bewerings dat “behoorlike instandhouding” die nutsmaatskappy se energiebeskikbaarheidsfaktor vir die eerste keer in jare tot hoër as 65% gestoot het.
