Krap jy kop oor die algemene beginsels van die deeltitelreg of het jy ’n spesifieke vraag oor die ontwikkeling, bewoning, benutting en bestuur van deeltitelskemas?
Het jy onlangs in ’n deeltitelskema belê en wonder jy dalk wie of wat ’n regspersoon is, oor die rol van die trustees – óf wie moet pa staan vir ’n lekkende waterpyp? En hoe gemaak met sonde tussen die bure?
Kom luister dan gerus na die kenners Lizelle Kilbourn en Maryna Botha by Die Burger se eerste deeltiteloggend, “Die ABC van Deeltitelreg”, op Donderdag 6 Junie.
Die geleentheid word by die Devon Valley-hotel buite Stellenbosch aangebied en beloof om interessant en leersaam te wees.
Kilbourn het in 2003 by die regsfirma STBB in Kaapstad aangesluit waar sy sedertdien as konsultant by regsopleiding en navorsing betrokke is. Sy is die outeur van die Juta-publikasie The ABC of Conveyancing en haar belangstellingsveld is deeltitelreg en die reg met betrekking tot aftreeoorde.
Botha, weer, is ’n direkteur by STBB en ’n kenner en adviseur rakende ondernemings se nakomingsverpligtings wat in wetgewing soos die Wet op die Beskerming van Persoonlike Inligting opgelê word.
Beide Botha en Kilbourn skryf Die Burger se immergewilde rubriek, “Deeltitelforum”, wat al vir dekades lank in die koerant se Eiendomme-bylae verskyn.
’n Kenner van deeltitelversekering, Martin Smuts, sal ook ’n kort aanbieding lewer.
Wat moet jy weet?
Die kaartjies kos R750 per persoon en sluit ’n volle buffetontbyt, koffie, tee, ’n ligte versnapering en ’n klein geskenksak in. Die aanbiedings word in Afrikaans gedoen. Daar sal tyd ingeruim word om voorbereide vrae te behandel.
Aankoms is om 08:15, waarna die program om 08:30 ’n aanvang neem. Die geleentheid duur tot 12:30.
Die kaartjies word op Quicket by die skakel https://qkt.io/CCNviN verkoop.
Vir meer inligting en ander navrae, stuur gerus e-pos na samantha.vandenberg@media24.com.