Sedert die eerste hofverskyning van die man wat verdink word van die moord op die Langebaan-inwoner Estelle Eksteen (61) in Maart vanjaar, is sy borgaansoek steeds nie afgehandel nie.
Anthony Jacobs (51) is op Donderdag 14 Maart weens die moord op Eksteen aangekeer – slegs vier dae nadat haar liggaam op 10 Maart in haar huis in Sunbird-rylaan deur haar man en seun ontdek is.
Eksteen het verskeie messteekwonde aan haar lyf gehad en is ook glo verwurg.
Jacobs het sedert sy inhegtenisneming al verskeie kere in die hof verskyn. Sy borgaansoek het op Vrydag 15 Maart begin, maar is weens getuienis wat nog gelewer moet word, nog nie voltooi nie.
Die staatsaanklaer, Dolf Nel, het bevestig Jacobs is steeds in aanhouding. Hy sal op Vrydag 10 Mei weer in die hof verskyn.
Die polisiewoordvoerder AO Joseph Swartbooi het intussen bevestig die ondersoek na die moord duur voort.