Netwerk24 se span is op die toneel in George waar die Neo Victoria-woonstelgebou Maandag ineengestort het. Jackie Kruger, verslaggewer, en Jaco Marais, fotograaf, vertel wat hulle op die toneel beleef.
Die oomblik as snuffelhonde wat oor die puin stap, begin blaf, moet daar doodse stilte wees. Alle voertuie moet afgeskakel word en niemand mag praat nie, sodat reddingswerkers kan luister vir die stem van ’n oorlewende.
“Toe die honde een maal só geblaf het, het hulle ons stil gemaak en dit het soos ’n ewigheid se stilte gevoel,” sê Kruger, wat al byna 20 jaar uit die Suid-Kaap verslag doen.