Die Springbok-kaptein, Siya Kolisi, is deur Time Magazine aangewys as een van die wêreld se 100 invloedrykste mense van 2024.
Time het dié lys, wat ook die Formule Een-wêreldkampioen Max Verstappen (26) insluit, Woensdag op sy webtuiste bekend gemaak. Dit kan die eerste van ’n paar eerbewyse wees wat Kolisi binne die volgende paar dae ontvang.
Kolisi (32) kan Maandagaand in Madrid ook ’n prestigeryke Laureus-sportprys in die kategorie “Terugkeer van die Jaar” verower ná sy merkwaardige herstel van ’n ernstige kniebesering voor verlede jaar se Wêreldbeker-rugbytoernooi in Frankryk. Die Springbokke is benoem in die Span van die Jaar-kategorie.