.
.
Die Suid-Afrikaanse Rugbyunie (Saru) en sy vennote in die Suidelike Halfrond se wens vir ’n “20-minute-rooikaartreël” in rugby kan straks op die hoogste vlak die wind van voor kry.
Ingevolge dié reël kan ’n speler wat ’n rooi kaart gekry het ná 20 minute in die koelkas deur iemand anders vervang word. Die beweegrede is om te verhoed dat een span vir die res van die wedstryd ’n speler meer op die veld het en die uitslag eintlik deur die kaart bepaal word. Dit ontneem toeskouers en TV-kykers vermaak omdat die wedstryd eensydig raak.
Luidens ’n berig in Midi Olympique is die Franse Rugbyfederasie, soos die rugbyunies van Engeland en Ierland, daarteen gekant. Wêreldrugby se raad stem op 9 Mei of die proefreël, wat al sedert 2020 in Superrugby geld en in vanjaar se Rugbykampioenskap gebruik gaan word, wêreldwyd op alle vlakke ingestel moet word. Dit sal 75% van die stemme verg, wat onwaarskynlik lyk gegewe die profiel van die unies in die Noordelike Halfrond wat daarteen gekant is.
