.
.
Rob Walter, afrigter van Suid-Afrika se witbalspanne, het Dinsdag met die aankondiging van die Proteas se T20-Wêreldbeker-uitverkorenes gesê hy kies geen groep sonder om dit eers met die direkteur van krieket (Enoch Nkwe) te bespreek nie.
Walter is gevra of die groep van 15 wat hy aangewys het, waarin net een etniese swart speler (Kagiso Rabada) is, goedgekeur is en of hy toestemming gehad het om so ’n groep te stuur na die T20-Wêreldbeker-toernooi (T20-WB), wat in Junie in Amerika en die Karibiese Eilande beslis word.
“Die realiteit is dat dit vir my onontbeerlik is om ’n seëvierende Protea-span te skep. Om dít te kan doen, moet ek spelers kies wat ek dink op ’n gegewe tydstip vir ons sukses kan behaal,” het Walter vanuit Nieu-Seeland gesê.
