Die topordekolwer Ryan Rickelton en naatbouler Ottniel Baartman is die nuwelinge in die Proteas se voorlopige groep vir die T20-Wêreldbeker (WB)-toernooi, wat in Junie in Amerika en die Karibiese Eilande gehou word.
Die snelbouler Lungi Ngidi kon nie weer die groep haal nie, maar is ’n reisende plaasvervanger. Ngidi het die Indiese Premierliga met ’n rugbesering misgeloop. Hy was in sy terugkeer tot die spel – vir die Titans in die pas afgelope T20-uitdaagreeks – nog nie weer homself nie.
Temba Bavuma, die Proteas se kaptein in 2022 se toernooi en in verlede jaar se WB-toernooi (50 boulbeurte) in Indië, het ook nie die groep gehaal nie. Kagiso Rabada is die enigste etniese swart speler in die groep van 15 spelers.