Byna drie jaar ná ’n botsing wat die lewe van Patrick Jewell (65) van Brits in Noordwes geëis het, het die jong man wat die botsing veroorsaak het, skuld beken op aanklagte van strafbare manslag en die bestuur van ’n voertuig sonder ’n rybewys.
Die 19-jarige het in ’n verklaring wat Woensdag in die landdroshof in Brits voorgelees is, volle verantwoordelikheid vir sy dade aanvaar en erken dat sy roekelose bestuur tot die botsing gelei het wat Jewell se dood veroorsaak het, sê AfriForum se private vervolgingseenheid in ’n verklaring.
Die 19-jarige het op 21 September 2021 sy pa se BMW X5 gevat vir ’n plesierrit saam met vriende. Jewell was dié dag op die sypaadjie buite sy huis besig om waterbottels in motor te laai om die blomme by sy vrou se graf te gaan natlei.