’n Lasbrief vir die inhegtenisneming van ’n bekende sanger in die Weskus en Kaapstad is Vrydag (19 April) in Kaapstad uitgereik.
Die rasperstemsanger Ivan van der Merwe (39) word gesoek omdat hy na bewering ’n beskermingsbevel se bepalings oortree het. Sy voormalige lewensmaat, Sune Huysamen (33), het op Vrydag 24 November 2023 ’n aanklag van ernstige aanranding teen hom aangemeld.
Van der Merwe tree vermoedelik in die Pretoria-omgewing op.
Huysamen het die beskermingsbevel verlede Vrydag (12 April) teen Van der Merwe verkry omdat hy na bewering in stem- en teksboodskappe gedreig het om haar seer te maak as sy nie die aanrandingsaak teen hom terugtrek nie.
Hy eis ook glo dat sy haar weergawe van die gebeure in die openbaar terugtrek.
’n Week later het Huysamen, na wat verneem word, ’n dreigende e-pos van Van der Merwe gekry wat die bepalings van die beskermingsbevel oortree.
Die polisie kon Van der Merwe nog nie in die hande kry om die inhegtenisneming uit te voer nie.
Van der Merwe se pa, Leonardus Johannes van der Merwe (67) van Vanrhynsdorp, is saam met hom aangekla van ernstige aanranding.
Die mans het Huysamen na bewering erg aangerand tydens ’n stryery verlede jaar.
Die verhoor oor die aangeleentheid begin Woensdag 22 Mei in die Vanrhynsdorp-landdroshof.