Die Personeelvereniging vir die Motorbedryf (Misa) is vol lof vir die polisie wat die laaste paar weke verskeie mense weens motordiefstal in hegtenis geneem het.
Dit hou vermoedelik verband met ’n sindikaat wat hom daarop toespits om Toyota Fortuners te steel of te kaap en in buurlande te verkoop. In een van die voorvalle is ’n Malawiese man Sondag ná ’n hoëspoedjaagtog op die R101 in ’n grys Toyota Fortuner 2.8 by die Shell Ultra City in Polokwane vasgetrek.
Brig. Hlulani Mashaba, polisiewoordvoerder in Limpopo, sê luidens ’n verklaring wat Misa uitgereik het, lede van die polisie se teensmokkel-taakspan het ’n wenk ontvang oor voertuie wat bestem is om van Suid-Afrika na Malawi en Zimbabwe deur die Beitbrug-grenspos (in Limpopo) gesmokkel te word.