.
.
Andries Erwee, stigter van die Kalahari Vasbyt-jeugkamp, ontken dat ’n sleepwaentjie onwettig gesleep is ten tyde van ’n ongeluk in Januarie vanjaar toe drie skoolseuns dood is nadat ’n Toyota Land Cruiser in Limpopo omgeslaan het.
Erwee het Sondag by navraag gereageer op mediaberigte dat die sleepwaentjie glo onwettig gesleep is, asook dat die Land Cruiser onwettig omgebou is en twee soortgelyke, omgeboude voertuie onlangs ’n padwaardigheidstoets gedop het wat gedoen is op aandrang van instansies wat by die ondersoek na die ongeluk betrokke is.
Die ongeluk het op 14 Januarie op die R510 tussen Lephalale en Vaalwater gebeur. Jean Conradie (17), ’n leerling aan die Hoërskool Parel Vallei, en Daniël Jordaan (16), ’n leerling aan Paul Roos Gimnasium in Stellenbosch (sowel Jean as Daniel was van Somerset-Wes), asook Werner Oosthuizen (16), ’n leerling aan die Austin Cove Baptist College in Mandurah, Australië, is in die ongeluk dood.
