Dit was Woensdag ’n frustrerende dag op die toneel in George waar die Neo Victoria-woonstelblok ineengestort het toe kontak met vasgekeerde werkers opgedroog het en reddingstegnieke aangepas moes word.
Woensdag teen 16:15 het reddingswerkers nie meer kontak met enige moontlike oorlewendes gehad nie, het Colin Deiner, hoof van rampbestuur in die provinsie, Woensdagmiddag gesê. Daar was een vals alarm deur die loop van die dag.
Almal wat gereageer het uit die puin, hetsy deur uit te roep of telefonies, is reeds gered. “Die meeste van hulle het nog gelewe,” sê hy. “Ons het ’n baie suksesvolle Dinsdagnag agter die rug met betrekking tot die redding van mense. Maar daar is tans geen reaksies nie,” het hy Woensdagmiddag gesê.