BMW het sy mededingers met ’n fluweelbedekte handskoen katswink geslaan toe sy weelderige 7-reeks-sedan Woensdagaand tydens ’n glansgeleentheid in Johannesburg as Suid-Afrika se nuwe Motor van die Jaar vir 2024 aangewys is.
Die groot weeldeskip (R2 270 000) met deure wat vanself oop en toe kan gaan, teruglê-sitplekke, en slimfoon-tipe kontroles vir die agterste passasiers waarmee gaste rolprente op ’n groot platskerm-TV wat uit die dak uit swaai kan kyk, het Suzuki se klein Fronx (R297 900) net-net om die louere uitgestof.
Daar was 18 finaliste in vanjaar se kompetisie wat in agt kategorieë meegeding het. Kategorieë wissel van dubbelkajuitbakkies, gesinsvoertuie en sportnutse tot verrigtingsmotors en intreemodelle.