.
.
Hulle is nou slegs via beperkte satellietkommunikasie met die buitewêreld in verbinding, maar sms-boodskappe lees dat hulle fluks vorder om ’n Guinness Wêreldrekord vir Suid-Afrika in te palm vir die hoogste swem. Dit moet hoër as 6370m bo seevlak wees om die vorige rekord te breek.
Na drie vliegritte en ’n 18-uur lange Jeeprit teen stywe kranse, het die span van sewe mense op 25 April die klimroete begin op soek na die hoogste swempoel op Berg Putha Hiumchili in die Himalajas.
Op 3 Mei was hulle reeds 10 dae in die berg en het reeds ’n hoogte van 5500m bo seevlak bereik. Hulle word vergesel deur 18 Sherpas en 30 Yakke (bees-tipe vervoerdiere) wat soveel as ’n ton se toerusting en kos die berg help uitdra om die span die beste kans te bied om hul doelwit te bereik. Die berg se hoogste punt is 7246m bo seevlak.
