Vir drie dae in September het twee beeldskone SARIE-lesers gevoel asof hulle droom …
SARIE Voorbladgesig 2021, Emme Scholtz, en SARIE Nuwe Gesig 2021, Nicole Nathan, is in September vir drie dae na die Moederstad weggevoer. Die rooi tapyt is vir SARIE se 2021-wenners uitgerol: hulle het in die luukse Radisson Blu Hotel & Residences in die middestad gebly, en is bederf met spa-behandelings by Isa Carstens. Hul drie dae in dié wêreld van glans is afgesluit op ’n hoogtepunt: eregaste by ’n gala-ete in een van die stad se mees glansryke hotelle.
SARIE.com het agter die skerms gaan kuier om solank vir jou ’n skelm kykie te gee na Nicole en Emme se voorblaaie, wat binnekort op die rak verskyn.
Die jeug sprankel
Dag 1 van die drie-dae-lange fotosessie was toegewy aan dié jaar se SARIE Nuwe Gesig, Nicole Nathan. Nicole en haar ma, Zelda, het van Pretoria na Kaapstad gereis vir dié fotosessie. Op die tweede dag van hul kuier in die Kaap, het die Isa Carstens Wellness Sanctuary in Stellenbosch vir ma en dogter bederf met 'n hele rits spa-behandelings.
'n Hart vir mense
Dié jaar se Voorbladgesig-wenner, Emme Scholtz, het 'n hart vir mense - sy floreer en sprankel wanneer sy met ander gesels en grappies met hulle kan deel. Emme se streke agter die skerms het die span gereeld laat giggel!
TV-gereed
Die span van Bravo het op stel van die fotosessies kom kuier om dié jaar se wenners beter te leer ken. Die episode word op Sondag, 31 Oktober op kykNET uitgesaai.
Bederf deur Isa Carstens
Dié jaar se hoofborg, die Isa Carstens Akademie, het die twee wenners nie net bederf met 'n spa-dag nie, maar ook met 'n geskenkpakkie vol produkte.
'n Geur vir elke dag
’n Spesiale bederf van Bacher and Co.: Nicole se prys is die geur Girl van Rochas. Dié parfuum bars met vars note van swartbessie, Jasmyn en vanielje. Emme se prys is die geur Authentic Woman van Abercrombie & Fitch. Dié parfuum bars met note van peer, magnolia en sandelhout.
Koppie 'n dag
Emme vertel dat, hoewel sy gek is oor koffie van Seattle Coffee Company, is sy eintlik 'n tee-drinker. Hier drink sy Earl Grey-tee uit Lavish'd se SARIE Mooi-koppies.
Luukse verblyf
Ons twee wenners is bederf met verblyf in die Radisson Blu Residence in Kaapstad se "penthouse"-suites. Boonop het SARIE Kos-redakteur Herman Lensing vir hulle kom kook in hul suites.
Eregaste
Die fotosessies is afgesluit met 'n heerlike en glansryke aand by die Mount Nelson Hotel in die hartjie van Kaapstad.
SARIE Voorbladgesig en SARIE Nuwe Gesig is met trots geborg deur Isa Carstens Akademie en Lavish'd. Spesiale dank aan die Radisson Blu Hotel & Residence in Kaapstad en Bacher and Co. wat bygedra het tot die wenners se pryse.
*Emme en Nicole se fotosessies verskyn op die voorblaaie en in die November / Desember-uitgawe van SARIE, wat vanaf 5 November op die winkelrakke is